2025 жылғы 24 наурызда Испанияның Сантьяго-де-Компостела университетінің Экономика және бизнес факультетінде Erasmus+ ERASMUS-EDU-2023-CBHE жобасы аясында «Дөңгелек экономика және орнықты даму саласындағы инновациялық оқу бағдарламалары мен модульдерін әзірлеу - CirculEC» халықаралық жобасының үшінші модулі басталды.
Д. Серікбаев атындағы Шығыс Қазақстан техникалық университеті жобаның грант иегері болып табылады және Орталық Азия елдерінен серіктес университеттердің, сондай-ақ орнықты даму саласындағы үздік білім беру тәжірибелерімен бөлісетін Еуропалық Одақтың жоғары оқу орындарының қатысуын үйлестіреді. Бұл университеттің халықаралық білім беру бастамаларын іске асырудағы жетекші үйлестірушілік және әдістемелік рөлін айқындайды.
Университет атынан Басқарма мүшесі - ғылым және инновациялар жөніндегі проректор, жоғары білім беруді реформалау жөніндегі Ұлттық топтың (HERE) сарапшысы Жадыра Конурбаева қатысуда. Ол модуль аясындағы негізгі іс-шаралар мен стратегиялық кездесулерге белсенді қатысуда.
Үшінші модульдің мақсаты - қатысушы жоғары оқу орындарының оқу үдерісіне енгізілетін өзекті білім беру контентін әзірлеу. Capacity building форматында жүзеге асырылатын бұл модуль академиялық ынтымақтастықты кеңейтуге, білім және тәжірибе алмасуға, сондай-ақ жаһандық сын-қатерлерге лайықты жауап бере алатын білікті мамандар даярлау тәсілдерін үйлестіруге арналған тиімді алаң болып табылады.
Модульдің ашылуында жоба үйлестірушісі, USC профессоры Ксавье Венсе «Айналмалы экономика және орнықтылық негіздері» тақырыбында баяндама жасады. Ол өз сөзінде дөңгелек экономиканың негізгі ұғымдары мен қағидаларын, орнықты дамуға көшуге бағытталған саясат пен стратегияларды, сондай-ақ әртүрлі салаларда табысты жүзеге асырылып жатқан практикалық мысалдарды ұсынды.
ШҚТУ халықаралық білім беру бастамаларының белсенді қатысушысы ретінде ғылым мен білім арқылы орнықты даму идеяларын жүйелі түрде ілгерілетіп келеді. Университет Еуропаның жетекші жоғары оқу орындарымен стратегиялық серіктестікті нығайта отырып, жаһандық экологиялық және экономикалық сын-қатерлерді еңсеруге қабілетті жаңа буын мамандарын даярлауға елеулі үлес қосуда. Сонымен қатар, университет тұрақты болашаққа бағытталған ғылыми-білім беру күн тәртібін қалыптастырып, халықаралық озық тәжірибелерді академиялық ортаға тиімді интеграциялау бойынша жүйелі жұмысын жалғастыруда.
