Бүгін облыс орталығында “My PRO” мамандықтар фестивалі өтті. Бес университет пен 17 колледж өз мамандықтарын ұсынды. Солардың ішінде Д.Серікбаев атындағы ШҚМТУ және жоғары IT колледж де бар.
60 жылдық тарихы бар техникалық университет бүгінгі таңда 50-ден астам мамандық бойынша білім береді. Мектеп оқушыларына болашақ мамандық таңдауда бағыт көрсету үшін кәсіптік бағдар беру бөлімінің мамандары қызықты викторина, квесттер ұйымдастырды.
- Мұндай кездесулердің пайдасы зор. 11-сынып оқушысы болғандықтан алдымда таңдау тұр. Әзірше, техникалық мамандықтармен таныстық. Квест арқылы ШҚМТУ-да қандай мамандықтар бойынша оқуға болатынын білдік, - дейді өскемендік Жангелді Танатов.
Фестиваль қатысушылары жоғары IT колледж туралы мағлұмат алды. 2016 жылдан бері ЖОО-ға қарасты колледж машина жасау технологиясы, ақпараттық жүйелер, қаржы, пайдалы қазбаларды байыту сынды 13 мамандық бойынша білім береді.
Алты жыл қатарынан ұйымдастырылып келе жатқан “My PRO” мамандықтар фестивалі 5 наурызға дейін жалғасады. ШҚМТУ және IT колледж мамандықтары туралы ақпарат алу үшін 8 (7232) 54 03 54 немесе 8 (7232) 51 08 85 нөмірлері бойынша хабарласуға болады.
Бренд кеңсе
