Шілде айының басында Д.Серікбаев атындағы ШҚМТУ-да магистрлердің кезекті оқу бітіру рәсімі өткізілді. Университет ректоры Нұрлан Темірбеков магистратура бітірушілеріне оқуды табысты аяқтау жөнінде куәландыратын 200 диплом табыстады. Ол магистранттарды осы салтанатты және де айырықша мәнді күнмен құттықтады:
– Біздің түлектер – бұл біздің байлығымыз, біз сіздерді мақтан тұтамыз! Бүгінде сіздер жаңа өмірге қадам басқалы отырсыздар. Сіздерді келешекте көптеген маңызды істер, жауапты шешімдер мен мәнді жетістіктер күтуде, – деп атап өтті Нұрлан Темірбеков. – Түлеп ұшқан туған университеттеріңізді ұмытпай, біздің ЖОО беделін жоғары ұстап, өмірдің биік шыңдарынан көріне беріңіздер!
Магистранттар өз тарапынан оқытушылар мен университет басшылығына өткен оқу жылдары үшін алғыстарын білдіріп, қалыптасқан дәстүр бойынша университетпен байланысты үзбей, әр уақытта өз көмегін аямайтынын айтты.
