Қадірлі ұстаздар, әріптестер!
Д. Серікбаев атындағы Шығыс Қазақстан техникалық университеті баршаңызды кәсіби мерекелеріңіз – Ұстаздар күнімен шын жүректен құттықтайды!
Ұстаз әр адамның өмірінде ерекше орын алады. Мектеп қабырғасында білімнің негізі қаланып, ғылым мен шығармашылыққа қызығушылық оянады, болашақ мамандыққа алғашқы бағыт-бағдар беріледі. Бүгінгі студенттердің, жас мамандардың, инженерлер мен ғалымдардың жетістіктерінің артында кезінде олардың қабілетін ашып, өз күшіне сенуге жол көрсеткен ұстаздардың еңбегі тұр.
Технологиялар қарқынды дамып, білімге қойылатын талаптар өзгеріп жатқан қазіргі кезеңде ұстаздың миссиясы бұрынғыдан да маңызды. Білім берумен қатар, шәкіртті өз бетінше ойлауға, сұрақ қоя білуге, шешім іздеуге, саналы таңдау жасауға және үнемі дамуға үйрету – ұстаз еңбегінің үлкен құндылығы.
ШҚТУ үшін мектептер мен педагогикалық ұжымдар – маңызды серіктестер. Бізді ортақ мақсат біріктіреді: жас ұрпаққа сапалы білім алуға, болашақ мамандығын саналы таңдауға және өз қабілетін толық жүзеге асыруға мүмкіндік беру.
Кәсібиліктеріңіз, төзімдеріңіз, даналықтарыңыз және ұстаздық жолға деген адалдықтарыңыз үшін шынайы алғысымызды білдіреміз!
Баршаңызға зор денсаулық, отбасылық амандық, шығармашылық шабыт және талапты шәкірттер тілейміз. Түлектеріңіздің әрбір жетістігі сіздерге мақтаныш сыйлап, еңбектеріңіз әрдайым лайықты құрметке бөлене берсін!
Ұстаздар мерекесі құтты болсын!
