«Күміс университет» немесе Үшінші буын университеті – егде жастағы азаматтарды оқытып, ішкі мүмкіндіктерін қайта ашуға және сұраныстарын орындауға бағытталған халықаралық қозғалыс.

Д. Серікбаев атындағы Шығыс Қазақстан техникалық университетінде қадірлі қарияларымызға арналған «Күміс университет» жобасы бастау алды.

Іс-шараның мақсаты - зейнет жасына келген қызметкерлер үшін қолайлы орта қалыптастырып, кәсіби және белсенді іс әрекетін сапалы жүзеге асыруға, әлеуметтік ортаға бейімделуге оңтайлы орта құру.

Жоба аясында цифрлық сауат ашу, құқық негіздері және қаржылық қауіпсіздік, тіл курстары, арт терапия, сауықтыру салалары бойынша оқу жүргізіледі. Дайындықтар семинар, тренинг, тәжірибе сағаты, экскурсия, лекция форматында өтеді. Бағыттардың әртүрлілігіне орай әр білім алушы өзіне ұнаған бағытты таңдап алады.

Университет биыл 65 жылдық мерейтойын атап өтеді. Ендеше «Күміс университет» жобасына оқу ордасының ардагер қызметкерлері қатысатыны сөзсіз.