Ағымдағы жылдың 27 ақпаны күні, Алғыс айту күніне орай, сондай ақ, Қазақстан халқы Ассамблеясының 30 жыл толуына байланысты Достық үйі - қоғамдық келісім орталығында «Ассамблея жастары» РҚБ төрағасы Тимур Жұмырбаевтың қатысуымен Шығыс Қазақстан облысының «Бірлік Power» студенттер Ассамблеясы салтанатты түрде ашылды.
Қадірменді қонақтар мен жастар қатысқан ашылу салтанаты, ең алдымен, Дәулет Серікбаев атындағы Шығыс Қазақстан техникалық университетінің Қытай Халық Республикасының Тяньцзинь қаласының әкімдігімен бірлесіп ашылған бірегей білім беру жобасы Лу Бань шеберханасына экскурсиямен басталды. Лу Бань шеберханасы озық білім беру технологияларын, заманауи зертханаларды және халықаралық инженерлік кадрларды даярлау тәжірибесін біріктіретін орталық болып табылады. Осы орайда, университетіміздің техникалық жетістіктері мен зерттеулері туралы қонақтарға университет профессоры Мұрат Мұздыбаев маңызды ақпараттармен бөлісті.
Қазақстан халқы Ассамблеясы Төрағасының орынбасары Марат Әзілхановтің тапсырмасымен, жоғары оқу орындарында Қазақстан халқы студенттік Ассамблеяларын құрудың маңыздылығын ескере келе, Д.Серікбаев атындағы Шығыс Қазақстан техникалық университеті алғашқылардың бірі болып, Студенттік Ассамблеясын ашты. Қазіргі таңда құрамына өз еркімен 38 студент қамтылып, 23-БЖК-1 тобының 2 курс студенті Төрегелдиева Диляра ұйымның төрағасы етіліп тағайындалды. Аталмыш ұйымның студенттері Қазақстан халқы Ассамблеясының 30 жылдығына орай университет қабырғасында ұйымдастырылған бірнеше іс-шарларға қатысып үлгерді.
Ұйым жетекшісі Төрегелдиева Диляра 24-26 ақпан аралығында ШҚО Ассамблея жастарының ұйымдастыруымен өткен «EthnoWinterCamp» лагеріне қатысты. Іс-шара барысында қатысушыларға спикерлер бүгінгі таңдағы түрлі өзекті тақырыптар төңірегінде (лудомания, нашақорлық, маскүнемдік) тренингтер өткізіп, ұлттық рухты көтеру, шешендік өнер, көшбасшылық қабілетті дамыту, бизнес бастау, маркетинг бойынша пайдалы білім мен ақпараттармен бөлісті, қатысушылар өз ойларын ортаға салды. Тренерлер ұйым жетекшілеріне командамен бірлесе оқу орындарындағы әлеуметтік-мәдени шараларды ұйымдастыру бағытында ауқымды жұмыстар атқаруға бағыт-бағдарлар берді. Сондай ақ, табиғат аясында тимбилдинг ұйымдастырылып, коньки, шаңғы, стюб тебу сияқты түрлі ойындар мен серуендер өткізілді.
Салтанатты жиын барысында университеттің студенттері мен оқытушыларына құрмет грамоталары мен сертификаттар табысталды. Құттықтаулар мен алғыстардан кейін концерттік бағдарламаға кезек берілді.
Қатысушылар осы шараның қорытындысы ретінде қаладағы Жастар ресурстық орталығы «JastarOskemen» мекемесінде, жастармен қатар шығармашылық командамен бірге подкаст түсіріп, жастар саясаты мен ассамблеяның болашақтағы жоспарлары турасында пікір алмасты.
Шығыс Қазақстан техникалық университетінің «Студенттік Ассамблеясы» - бұл тек оқу орнының ішкі ұйымы ғана емес, сондай-ақ облысымыздағы барлық жастарды біріктіріп, олардың қоғамдағы орнын нығайтуға бағытталған маңызды бастама. Жастардың ғылыми, мәдени және қоғамдық іс-шараларға белсенді араласуы қоғамның дамуына үлкен ықпал етеді деген сенімдеміз.
