Д. Серікбаев атындағы Шығыс Қазақстан техникалық университетінде Қазақстанның Еңбек Ері, Қазақстан Республикасы Мемлекеттік сыйлығының лауреаты, металлургия саласының көрнекті өкілі Бағдат Мұхаметұлы Шаяхметовтің туғанына 80 жыл толуына арналған «Шығыстың дара тұлғасы» атты танымдық конференция өтті.

Іс-шараға мемлекеттік органдардың, жоғары оқу орындарының, өнеркәсіптік кәсіпорындардың, ардагерлер ұйымдарының және жастар қауымдастығының өкілдері қатысты. Конференция барысында Бағдат Шаяхметовтің еңбек жолы, отандық металлургияны дамытуға қосқан үлесі және жас мамандарды даярлаудағы рөлі туралы айтылды.

Бағдат Мұхаметұлы еңбек жолын Өскемен титан-магний комбинатында қарапайым жұмысшыдан бастап, өндірістің барлық сатысынан өтті. Кейін кәсіпорын басшысы ретінде комбинаттың өндірістік әлеуетін сақтауға, технологиялық жаңғыруына және халықаралық нарыққа шығуына зор үлес қосты. Оның басшылығымен Қазақстанның титан-магний өнеркәсібін дамытуға бағытталған маңызды жобалар жүзеге асырылды.

Бағдат Шаяхметовтің есімі Д. Серікбаев атындағы ШҚТУ-мен де тығыз байланысты. Ол университеттің құрметті профессоры ретінде инженерлік білімнің дамуына, ғылым мен өндіріс арасындағы байланысты нығайтуға және металлургия саласына білікті мамандар даярлауға ерекше көңіл бөлді.

Конференция аясында ШҚТУ мен Өскемен титан-магний комбинаты арасындағы ынтымақтастыққа арналған бейнеролик көрсетілді. Сонымен қатар «Металлургия» білім беру бағдарламасының студенті сөз сөйлеп, болашақ мамандар үшін Бағдат Шаяхметовтің кәсіби жолы мен тұлғалық қасиеттерінің маңызын атап өтті.

Бүгінде университет пен кәсіпорын арасындағы серіктестік білім беру, ғылым және кадр даярлау бағыттарында жалғасуда. Мұндай ынтымақтастық студенттерге өндірістік ортаны тереңірек танып, тәжірибелік дағдыларын дамытуға және оқуын аяқтағаннан кейін саланың дамуына үлес қосуға мүмкіндік береді.

Іс-шарада Шығыс Қазақстан облысы әкімінің орынбасары Айдар Садырбаев, «Өскемен титан-магний комбинаты» АҚ президенті Әсем Мамутова, кәсіпорын ардагерлері, мемлекет және қоғам қайраткерлері мен білім саласының өкілдері сөз сөйледі. Олар Бағдат Мұхаметұлының кәсібилігі, елге қызмет етуі және ұжыммен жұмыс істей білуі кейінгі буын үшін үлкен өнеге екенін атап өтті.

Конференция «Шығыс Қазақстан облысының құрметті ардагері» төсбелгісімен марапаттау рәсімімен және музыкалық бағдарламамен қорытындыланды.

«Шығыстың дара тұлғасы» конференциясы көрнекті металлургтің мұрасын дәріптеп қана қоймай, аға буынның өндірістік тәжірибесін жастарға жеткізетін маңызды алаңға айналды. Бағдат Шаяхметовтің өмір жолы — өз мамандығына адалдықтың, табанды еңбектің және ел өнеркәсібінің дамуына жауапкершілікпен қызмет етудің жарқын үлгісі.