Ағымдағы жылдың 12 ақпаны күні Жошы Ұлысының 800 жылдығына орай «Алтын Орда кезеңіндегі Ұлы дала (XIII-XV ғ.ғ.)» тақырыбында ашық дәріс сабағы өтті. Дәрісті Қазақстан тарихы және әлеуметтік-саяси пәндер кафедрасының қауымдастырылған профессоры, тарих ғылымдарының кандидаты Айдарбаева Р.К. жүргізді.
Дәріс барысында Раушан Қайсанқызы «Ұлы дала» ұғымының пайда болуы, Әлемнің төрттен бір бөлігін жаулап алған Ұлы Монғол империясының тарихы мен тарихнамасы, Жошы ханның Ұлы дала тарихындағы орны жөнінде құнды деректермен таныстырып, салыстырмалы-тарихи талдау жасады.
Дәріс интерактивті және диалог форматында өтті, студенттер тақырыпқа үлкен қызығушылық танытып, аудиториямен кері байланыс орнатылды, қойылған сұрақтарға студенттер толыққанды мағлұматтар алды.
Сондай-ақ, Жошы Ұлысының 800 жылдығына орай университетіміздің ғылыми кітапханасында апталық кітап көрмесі ұйымдастырылды. Аталмыш тақырыптағы іс-шаралар университетімізде әлі де жалғасын табатын болады.
Іс-шараны Қазақстан тарихы және әлеуметтік-саяси пәндер кафедрасы мен Әлеуметтік-мәдени қызмет және жастар саясаты басқармасы ұйымдастырды.
