Д. Серікбаев атындағы Шығыс Қазақстан техникалық университетінде Ғылыми кеңестің кеңейтілген отырысы өтіп, онда Қазақстан Республикасының Жаңа Конституциясы жобасының негізгі ережелері мен конституциялық реформаның мазмұны жан-жақты талқыланды.
Іс-шараға университеттің профессор-оқытушылар құрамы мен қызметкерлері қатысты. Отырыс барысында Жаңа Конституция жобасында айқындалған басты құндылықтар, қағидаттар мен жаңашыл өзгерістер, сондай-ақ олардың білім беру жүйесі мен қоғамның дамуына ықпалы қарастырылды.
Кеңейтілген отырыс аясында жоғары және жоғары оқу орнынан кейінгі білім беру мәселелері, Конституция жобасының тұғырнамалық негіздері, білім саласына қатысты конституциялық нормалар және жаңа мәтіндегі негізгі өзгерістер жөнінде мазмұнды баяндамалар жасалды.
Аталған тақырыптар бойынша Бизнес-мектептің профессоры, экономика ғылымдарының докторы Ю.В. Баталов, «Қазақстан тарихы және әлеуметтік-саяси пәндер» кафедрасының аға оқытушысы, саяси ғылымдар кандидаты С.А. Линок, осы кафедраның меңгерушісі Г.З. Қапасова, сондай-ақ аға оқытушы Ж.А. Садвакасова баяндама жасады.
Сонымен қатар Шығыс Қазақстан облыстық Қоғамдық кеңесінің төрағасы А.Т. Ашімова Конституциялық комиссияның жұмысы және Жаңа Конституция мәтінін әзірлеудегі негізгі қағидаттар туралы ақпарат берді.
Отырыс барысында Жаңа Конституция жобасының демократиялық құндылықтарды нығайтуға, адами капиталды дамытуға, білім мен ғылымның елдің тұрақты дамуының стратегиялық негізі ретіндегі рөлін арттыруға бағытталғаны атап өтілді.
Ғылыми кеңестің кеңейтілген отырысы университет қауымдастығы үшін құқықтық сауаттылықты арттыруға және конституциялық реформаның маңызын терең түсінуге мүмкіндік беретін маңызды диалог алаңына айналды.
