2025 жылғы 10 қазанда Ташкент қаласындағы Central Asian University (CAU) алаңында Еуропалық комиссия қаржыландыратын Erasmus+ CirculEC - «Айналмалы экономика және тұрақты даму саласында инновациялық оқу бағдарламалары мен модульдерін әзірлеу» (жоба № 101129169) жобасының мониторингтік кездесуі өтті. Д. Серікбаев атындағы Шығыс Қазақстан техникалық университетінің (ШҚТУ) делегациясы жоғары білімге айналмалы экономиканың қағидаттарын енгізу барысын бағалауға және білім беру бағдарламаларын жаңарту жөніндегі келесі қадамдарды айқындауға арналған пленарлық және жұмыс сессияларына қатысты.
Іс-шара гибридті форматта өтті және жаңа әрі жаңартылған оқу модульдерінің таныстырылымын, «Circularity in Play» практикалық сабақтарына баруды, студенттік Circular World Exhibition көрмесін, сондай-ақ CAU-дың тұрақтылық инфрақұрылымы бойынша кампус-турды қамтыды. Оған Орталық Азия мен Еуропаның жоғары оқу орындарынан, индустриялық әріптестер мен білім беру стейкхолдерлерінен 50-ден астам өкіл қатысты. Бағдарлама сертификат табыстау рәсімімен, нетворкинг сессияларымен және одан арғы ынтымақтастықты талқылаумен толықтырылды. CAU тоғыз мамандандырылған модуль әзірлеудің нәтижелерін таныстырды, оның ішінде екі жаңа курс - «Circular Economy and Sustainable Development» және «Sustainable Business Practices» - Бизнес мектебі мен Сәулет және дизайн мектебіне интеграцияланды.
Тұрақты даму мен «жасыл» экономика саласындағы CAU-дың стратегиялық басымдықтары ШҚТУ-дың айналмалы қағидаттарды пәнаралық тұрғыда интеграциялау және индустриямен серіктестікті дамытуға бағытталған күн тәртібімен үндеседі. Кездесу қорытындысында ШҚТУ мен CAU ынтымақтастық туралы меморандумға қол қойды; құжат CirculEC модульдерін бірлесіп әзірлеу және пилоттау, профессор-оқытушылар құрамы мен студенттердің академиялық ұтқырлығын, бірлескен зерттеулерді, сондай-ақ салалық компанияларда тәжірибеге бағытталған тағылымдамалар мен жобалық қызметті көздейді.
Орталық Азияда және CirculEC консорциумында маңызды рөл атқаратын ШҚТУ «жасыл» экономика үшін кадрларды даярлауда еуропалық озық тәжірибені жүйелі түрде бейімдеп, кеңінен таратуда: бұл қалдықтарды басқарудан және айналмалы бизнес-модельдерден бастап, тұрақты қалалық жоспарлау мен «жасыл» кәсіпкерлікке дейін қамтиды. Мониторингтік кездесуге қатысу және қол жеткізілген келісімдер ШҚТУ-дың білім беру бағдарламаларын жаңартуға қосатын үлесін күшейтіп, түлектердің аймақтық және жаһандық еңбек нарықтарындағы бәсекеге қабілеттілігін арттыруға, сондай-ақ қоғам үшін маңызды климаттық және экологиялық міндеттерді практикалық тұрғыдан шешуге ықпал етеді.
