Д. Серікбаев атындағы ШҚТУ базасында Қазақстан Республикасындағы Біріккен Ұлттар Ұйымының Даму Бағдарламасының ұйымдастыруымен Skills UP Жастар хакатоны өтті. Іс шара Қазақстанның 4 өңірінде, Өскемен, Қарағанды, Түркістан және Ақтау қалаларында өтті.
Шығармашылық және техникалық қабілетті жетілдіріп, ойлап табу қасиетін арттыратын, жаңа ғасырдың технологиясын дәріптейтін сайыс жастардың ойындағы мүмкіндіктерді бойына дарытуды көздейді.
Күн көлемінде өтетін сайыстың салтанатты ашылуында Д. Серікбаев атындағы ШҚТУ Басқарма Төрағасы Ректор Рахметуллина Сәуле Жәдігерқызы қатысып отырған мектеп оқушыларына, колледж және жоғары оқу орындарының студенттеріне тың идеялар, шығармашылық табыс және ең бастысы сәттілік тіледі.
Айта кету керек, Skills UP Жастар хакатонына 16 жастан бастап қатысуға рұқсат.Қазақстанның түкпір-түкпірінен жиналған талантты жастардың ақыл сайысында өңірден келіп отырған барлық болашақ ғалымдар, инженерлер және командалардың жеңісі үшін қуану құптарлық.
Хакатон қорытындысы бойынша жеңімпаз 3 команда анықталды. Олар: Д. Серікбаев атындағы Шығыс Қазақстан техникалық университетінің «Защита» командасы, Аягөз қалалық көпбейінді мектеп гимпанзиясының "Bumblebee" және Физика-математика бағытындағы Назарбаев Зияткерлік мектебінің (Семей қ.) "Slay" командалары.
Байқаудың қорытынды сайысы Ұлттық білім апталығы аясында Алматы қаласында өтеді. Әрбір өңірден үш команда іріктеліп, ақтық сайыста ел көлемінде жиналған 12 команда сайысады. Бас жүлде - жеңіске жетелеген стартапты жүзеге асыруға 12 000$ грант алу.
Сондықтан, өңірлік сайыс жеңімпаздарын құттықтай отырып, ақтық сайыста сәттілік тілейміз!
