Д. Серікбаев атындағы Шығыс Қазақстан техникалық университеті Халықаралық инженерия мектебінің қауымдастырылған профессоры Д. Мырзабекова Qazaq AI Research University (QAIRU) сараптамалық тобының «Smart-технологиялар, жасанды интеллект және көлік машинажасау» магистрлік білім беру бағдарламасын әзірлеуге арналған отырысына қатысты.
Жаңа білім беру бағдарламасын әзірлеу жұмыстары Астанада өткен AI & Digital Bridge 2026 халықаралық форумы аясында қол қойылған келісімді іске асыру шеңберінде жүргізілуде. Құжат AI+X моделі бойынша білім беру бағдарламаларын дамыту жөніндегі университеттер консорциумын құруды көздейді.
Отырыс барысында сарапшылар магистрлік бағдарламаның құрылымы мен мазмұнын, негізгі пәндерін, күтілетін оқыту нәтижелерін, сондай-ақ жасанды интеллект технологияларын көлік машинажасау саласының мамандарын даярлау үдерісіне енгізу тетіктерін талқылады.
Бірлескен жұмыстың негізінде кәсіби құзыреттерді тиімді бөлу қағидаты жатыр. QAIRU жасанды интеллект, машиналық оқыту және деректерді талдау саласындағы сараптаманы қамтамасыз етсе, ШҚТУ бағдарламаның инженерлік құрамдас бөлігіне, соның ішінде механика, көлік технологиялары және практикалық даярлық бағыттарына жауап береді.
Сараптамалық топ мүшелері болашақ магистрлерге заманауи цифрлық құралдарды қолданумен қатар, көлік саласына арналған интеллектуалды шешімдерді әзірлеуге мүмкіндік беретін пәнаралық бағдарламаны қалыптастыруға ерекше назар аударды.
Бағдарламаны іске асыратын практикалық алаңдардың бірі – ШҚТУ-дағы Халықаралық Лу Бань шеберханасы. Мұнда қалыптасқан заманауи инфрақұрылым интеллектуалды көлік, электромобильдер, автономды басқару және цифрлық технологиялар саласында практикалық сабақтар мен зерттеулер жүргізуге мүмкіндік береді.
ШҚТУ өкілінің сараптамалық топ жұмысына қатысуы QAIRU-мен серіктестікті жүзеге асыру жолындағы кезекті практикалық қадам болды. Бірлескен магистрлік бағдарлама терең салалық білімі мен жасанды интеллект саласындағы құзыреттері бар жаңа буын инженерлерін даярлауға ықпал етеді.
