Д. Серікбаев атындағы Шығыс Қазақстан техникалық университетінің өкілдері «Қазатомөнеркәсіп» ҰАК» АҚ және «Үлбі металлургиялық зауыты» АҚ мамандарымен бірге Бельгияға жұмыс сапарын аяқтады. Сапар қорытындысында критикалық маңызды металдарды өңдеу саласындағы бірлескен бастамалардың техникалық-экономикалық негіздемелерін әзірлеу, ғылыми зерттеулерді дамыту және технологиялармен алмасу жөнінде уағдаластықтарға қол жеткізілді.
Қазақстандық делегация Hydrometal S.A. және Campine NV компанияларымен келіссөздер жүргізді. 1985 жылы құрылған Hydrometal S.A. түсті, сирек және бағалы металдар бар күрделі материалдарды, соның ішінде батареялардан, электроникадан және катализаторлардан алынатын қайталама шикізатты өңдеуге маманданған.
Жүз жылдан астам тарихы бар Campine NV компаниясы қайталама түсті металдарды өңдеу және арнайы химиялық өнімдер өндіру саласындағы жетекші еуропалық кәсіпорындардың бірі саналады. Компания 1912 жылы Compagnie Métallurgique de la Campine атауымен құрылған.
Кездесулер барысында тараптар қазақстандық шикізатты өңдеу, пилоттық жобаларды жүзеге асыру және заманауи технологиялық шешімдерді отандық кәсіпорындардың жағдайына бейімдеу мүмкіндіктерін талқылады. Ресурстарды пайдалану тиімділігін арттыруға және өндірістің қоршаған ортаға түсіретін жүктемесін азайтуға ерекше назар аударылды.
Сапар аясында қазақстандық мамандар 2026 жылғы 2–4 қыркүйекте Бельгияның Мехелен қаласындағы LAMOT Congress & Heritage Centre орталығында өткен ICHS 2026 циклдік гидрометаллургия жөніндегі II халықаралық симпозиумға қатысты. SOLVOMET ұйымдастырған форум Еуропалық зерттеу кеңесінің (ERC) және Horizon Europe бағдарламасының бірқатар жобасының қолдауымен өтті.
Симпозиум Еуропа, Азия және Солтүстік Американың ғылыми орталықтары мен өнеркәсіптік компанияларынан келген 200-ден астам өкілді біріктірді. Horizon Europe бағдарламасы аясында форумға қолдау көрсеткен бастамалардың қатарында ШҚТУ қатысатын TiBeRIUM жобасы да бар.
Халықаралық алаңда сирек жер элементтерін, литийді, кобальтты және басқа да критикалық маңызды металдарды өңдеудің жаңа технологиялары таныстырылды. Қатысушылар химиялық реагенттерді қалпына келтіру және қайта пайдалану, су мен энергия шығынын азайту, өндірістік қалдықтарды барынша қысқарту секілді циклдік гидрометаллургия қағидаттарын практикаға енгізу мәселелерін қарастырды.
ШҚТУ өкілдері KU Leuven ғалымдарымен жеке кездесу өткізіп, университетте құрылып жатқан Сирек жер элементтері орталығын дамыту, бірлескен ғылыми-зерттеу жобаларын іске асыру және жоғары технологиялық салалар үшін білікті кадрлар даярлау мәселелерін талқылады.
Жүргізіліп жатқан жұмыс Қазақстан Республикасында жоғары білім мен ғылымды дамытудың 2023–2029 жылдарға арналған тұжырымдамасында белгіленген қолданбалы зерттеулерді, халықаралық ғылыми кооперацияны және университеттердің экономиканың нақты секторымен өзара іс-қимылын дамыту басымдықтарына сәйкес келеді.
ШҚТУ, «Қазатомөнеркәсіп» ҰАК» АҚ және Үлбі металлургиялық зауыты арасындағы ынтымақтастық университеттің ғылыми әлеуетін өндірістің нақты міндеттерімен ұштастыруға мүмкіндік береді. Қол жеткізілген уағдаластықтар озық технологияларды трансферттеуге, Қазақстанда минералдық шикізатты терең өңдеуге және жоғары технологиялық өнеркәсіп үшін мамандар даярлауға негіз қалайды.
