Ағымдағы жылдың 27-28 сәуір күндері Ж. Аймауытов атындағы Павлодар облыстық қазақ музыка-драма театры Өскемен қаласындағы Шығыс Қазақстан облыстық драма театрында гастрольдік іс-сапарда болды.

Ж. Аймауытов театрын тамашалауға біздің университеттің өнер сүйер қауымы да күнделікті күйбең тіршілікті қоя тұрып, рухани демалып қайтты.

Гастрольшілер сахна төрінде өздерінің үздік туындыларын, атап айтар болсақ, ақын, жазушы, философ, тарихшы, композитор Шәкәрім Құдайбердіұлының туғанына 165 жыл толуына орай, ақынның «Ұждан» әңгімесінің желісі бойынша «Ұждан» (реж: Азамат Нигманов) қойылымын, Қ.Жүнісовтың «Алғашқы махаббат» (реж: Ж.Садықов) комедиясын және бүлдіршіндерге арналған Б.Шолпанқұлдың «Аладдин» ертегісін ойнап, көрермендерді тәнті етті.