1 қыркүйек – Білім күні Д.Серікбаев атындағы ШҚМТУ-да жаңа оқу жылы басталуына арналған мерекелік шара өтті.
Бірінші және жоғары курс студенттерін университет ректоры, физика-математика ғылымдарының докторы, профессор Нұрлан Темірбеков құттықтады.
- Биыл ерекше жыл, университет 55-ке толып отыр. 18 қыркүйекте университетте ШҚМТУ-дың мерекесіне арналған халықаралық конференция өтеді. Өткен мерзімде талай табыстарға қол жетті, біз оны мақтан етеміз. ШҚМТУ инновацияға бағытталған ЖОО-ның алғашқы ондығына кіреді. Ал алдағы уақытта атқарылар істер ұшан-теңіз, - деді Нұрлан Темірбеков. Ректор бірінші курс студенттерін алғашқы оқу күнімен құттықтап, олар үшін барлық жағдай жасалғандығын айтты.
- Біздің университетті таңдағандарыңа қуаныштымын, - деді Н.Темірбеков. – Биыл ШҚМТУ-ға медалистер - «Алтын белгі» иегерлері, ерекше үлгідегі аттестат алғандар, олимпиадалардың жеңімпаздары түсті. Талантты балалардың қадамдарына гүл бітсін.
Бұл күні жоғары оқу орнынан кейінгі білім, жаңа білім беру технологиялары институтының докторы, физика-математика ғылымдарының кандидаты Еркен Тұрғанбаевқа PhD докторы халықаралық үлгідегі дипломы, ал озат студенттерге ҚР Президенті стипендиясын тағайындау туралы сертификаттары тапсырылды.
