Д.Серікбаев атындағы Шығыс Қазақстан мемлекеттік техникалық университетінде ЖОО-ның барлық мамандықтарының бірінші және екінші курс студенттерінің «Кемеңгер Абай, бірегей Абай» атты жалпыуниверситеттік студенттік олимпиадасы өтті. Оны «Абай және ХХІ ғасыр» Халықаралық клубының Шығыс аймақтық орталығы ұйымдастырды.

Олимпиаданың салтанатты ашылуында Шығыс Қазақстан облыстық достық үйінің директоры Эльдар Төлебеков, Д.Серікбаев атындағы ШҚМТУ-дың «Философия және адам дамуының проблемалары» кафедрасының доценті, социологиялық ғылымдар кандидаты, кураторлар мен эдвайзерлер кеңесінің төрайымы Элеонора Столярова, Д.Серікбаев атындағы ШҚМТУ-дың «Философия және адам дамуының проблемалары» кафедрасының меңгерушісі, тарих ғылымдарының кандидаты Нелли Краснобаева, осы университеттің «Қазақ, орыс тілдері және іс жүргізу» кафедрасының доценті, филология ғылымдарының докторы Күлжібек Құсманова құттықтау сөз сөйледі.

«Абай және ХХІ ғасыр» Халықаралық қоры Шығыс аймақтық орталығының жетекшісі Лаура Әбдіғалиева атап өткеніндей, олимпиада мақсаты - ұлы ақын мен ойшыл, қайраткер Абай Құнанбаевтың мұрасын терең зерттеу, техникалық мамандықтағы студенттердің гуманитарлық қызметін белсендірек ету және олардың арасынан шығармашылыққа икемді, ой-өрісі кең, белсенді жастарды табу.