Қазақстанда бағдарламалау және жасанды интеллект бойынша Tomorrow School мектептер желісі атты ауқымды білім беру жобасы бастау алды. Бастама іске асырылатын өңірлердің қатарында Шығыс Қазақстан облысы да бар, бұл аймақтың цифрлық экономиканы дамытудағы және жаңа буын кадрларын даярлаудағы жоғары әлеуетін көрсетеді.
Телемост форматында Мемлекет басшысы Қасым-Жомарт Тоқаев елдің 14 өңірінде бірден мектептер желісінің ресми түрде іске қосылғанын жариялады. Жоба стратегиялық маңызға ие және IT-құзыреттер мен жасанды интеллектті дамытуға бағытталған заманауи экожүйе қалыптастыруды көздейді.
Шығыс Қазақстан облысында Tomorrow School бастамасы Д. Серікбаев атындағы Шығыс Қазақстан техникалық университетінің базасында жүзеге асырылуда. Бұл таңдау кездейсоқ емес. Бұл шешім өңір әкімдігі деңгейінде қолдау тауып, ВКТУ жаңа білім беру моделін енгізудің негізгі алаңы ретінде айқындалған.
Университеттің таңдалуы оның цифрландыру саласындағы жүйелі жұмысы, заманауи инфрақұрылымының болуы және оқытудың тәжірибеге бағытталған тәсілімен тікелей байланысты. Бүгінде ВКТУ қарқынды өзгеріп жатқан технологиялық ортада жұмыс істей алатын мамандарды даярлайтын білім беру кеңістігін қалыптастырып отыр.
Ашылу рәсіміне Шығыс Қазақстан облысы әкімдігінің өкілдері- облыс әкімі аппаратының басшысы Текешов Е. Х. және Шығыс Қазақстан облысының цифрландыру және архивтер басқармасының басшысы Бимагамбетов Қ.Б. қатысты. Бұл жобаға өңір тарапынан жоғары деңгейде институционалдық қолдау көрсетіліп отырғанын айғақтайды.
Tomorrow School бұл түбегейлі жаңа білім беру моделі. Оқыту толықтай тегін және ақпараттық технологиялар саласына енді қадам басып жатқан 18 жастан асқан барлық азаматтарға қолжетімді.
Негізгі ерекшелігі - peer-to-peer жаңа форматы: дәстүрлі оқытушылар мен лекциялар жоқ. Оқу үдерісі тәжірибе, бірлескен жұмыс және нақты міндеттерді шешу арқылы жүзеге асады. Бағдарлама 18–24 айға есептелген және JavaScript, Go, Python, Rust сияқты заманауи бағдарламалау тілдерін меңгеруді қамтитын 50-ден астам жобаны қамтиды.
Мұндай тәсіл тек білім беріп қана қоймай, индустрияда сұранысқа ие практикалық дағдыларды қалыптастырады: дербестік, сыни ойлау, командада жұмыс істеу және нәтижеге жауапкершілікпен қарау. Білім беру инфрақұрылымына тәулік бойы қолжетімділік оқу мәдениетінің жаңа түрін қалыптастырады - икемді, қарқынды және нәтижеге бағытталған.
Шығыс Қазақстан облысында Tomorrow School-дың іске қосылуы тек білім беру жобасы ғана емес, сонымен қатар өңірлік цифрлық құзыреттер экожүйесін қалыптастырудағы маңызды қадам. Бұл жастарға сұранысқа ие мамандықты игеруге, IT саласында өзін жүзеге асыруға және жаһандық деңгейде бәсекеге қабілетті болуға нақты мүмкіндік береді.
ШҚТУ үшін бұл өңір мен елдегі жетекші технологиялық орталықтардың бірі ретіндегі мәртебесінің расталуы. Университет жаңа бастамаларға жай ғана қосылып қоймай, жүйелі өзгерістердің бір бөлігіне айналып, Қазақстанның жаңа білім беру шындығын қалыптастыруда.
