Шығыс Қазақстан техникалық университетінің ғалымдары өңірдің ежелгі петроглифтерін цифрлау бойынша ерекше жобаны жүзеге асыруда. Жоба нәтижесінде әлемнің түкпір-түкпірінен келген зерттеушілерге қолжетімді болатын палеолиттік суреттердің виртуалды көшірмелері жасалады, сондай-ақ бұл бірегей артефактілердің болашақ ұрпақтарға сақталуы қамтамасыз етіледі.
Шығыс Қазақстан облысында Қазақстанның ең көне петроглифтерінің бірі орналасқан, олардың жасы 4 мың жылдан асады. Минералды бояулармен тасқа салынған бұл суреттер табиғи факторлардың әсерінен уақыт өте келе өз анықтылығын жоғалтуда. Цифрлау оларды өзгеріссіз күйде сақтап, мәдени мұраны жоғалудан сақтайды.
Зерттеу «Қазцинк» ЖШС тарапынан 56 миллион теңге көлемінде қаржылай қолдауға ие болды, бұл жобаны жоғары технологиялық деңгейде жүзеге асыруға мүмкіндік береді.
Тас суреттерінің егжей-тегжейлі виртуалды көшірмелерін жасау олардың сақталуын және ғылыми қауымдастық үшін қолжетімділігін қамтамасыз етеді. Киелі ландшафттар бойынша виртуалды турды әзірлеу зерттеушілер мен тарих әуесқойларына ежелгі суреттерді интерактивті форматта зерттеуге мүмкіндік береді, бұл өз кезегінде түпнұсқалардың бұзылуын болдырмайды. Жобаның маңыздылығы оның өңірдің тарихи-мәдени мұрасын танымал етуге, оның бірегейлігі мен құндылығына назар аударуға ықпал ететіндігінде. Сонымен қатар, бұл жоба Шығыс Қазақстанда ғылыми туризмді дамытуға серпін беріп, жаңа зерттеу бағыттарын ашуға және халықаралық ынтымақтастық үшін мүмкіндіктер жасауға себеп болады.
Жобаның соңғы кезеңінде үш тілде - қазақ, орыс және ағылшын тілдерінде арнайы веб-ресурс әзірленеді. Бұл ақпаратқа кең халықаралық аудиторияның қолжетімділігін қамтамасыз етіп, Шығыс Қазақстан облысының мұрасын әлемдік деңгейде ілгерілетуге ықпал етеді.
ШҚТУ өңірдің тарихы мен мәдениетін сақтауға заманауи технологияларды енгізуді жалғастыруда, Шығыс Қазақстанның мұрасын ғылымға, туризмге және болашақ ұрпақтарға қолжетімді етуге тырысады.
