Д. Серікбаев атындағы Шығыс Қазақстан техникалық университетінің студенттері үшінші жыл қатарынан Қостанай қаласына Allur компаниясының автомобиль зауытында дуальды оқудан өту үшін барады.
Ағымдағы оқу жылында бағдарламаға келесі білім беру бағдарламалары бойынша оқитын 13 студент қатысуда: «Автомобиль жолдарының құрылысы және пайдалану»; «Механика және металл өңдеу»; «Көліктік машина жасаудағы смарт технологиялар мен жасанды интеллект»; «Техникалық физика».
Бағдарламаны жүзеге асыруда жоғары білім мен заманауи өндіріс арасындағы байланыстырушы буын болып табылатын Allur Корпоративтік университеті маңызды рөл атқарады. Оның қатысуымен студенттерге ұйымдастырушылық және білім беру бағытында қолдау көрсетіліп, практикалық құзыреттерді меңгеруге және компанияның корпоративтік стандарттарымен танысуға жағдай жасалады.
Дуальды оқыту аясында студенттер ЦСЛТ цехында жұмысын бастап, кәсіпорынның негізгі технологиялық және өндірістік үдерістерімен танысады. Зауыттың тәжірибелі мамандарының жетекшілігімен олар механикалық құрастыру жұмыстары слесарінің жұмысшы мамандығын меңгеріп, қажетті практикалық дағдыларды игереді және университетте алған білімдерін нақты өндірістік жағдайда қолдануды үйренеді.
Дуальды оқыту форматы студенттерге заманауи жабдықтар мен автомобиль жасау технологияларын меңгеріп қана қоймай, кәсіби жауапкершілікті, тәртіпті, командада жұмыс істеу дағдыларын және қауіпсіз еңбек мәдениетін қалыптастыруға мүмкіндік береді.
Болашақ мамандар кәсіпорын талаптарына тезірек бейімделуге, білікті тәлімгерлердің тәжірибесін үйренуге және автомобиль өнеркәсібінде сұранысқа ие құзыреттерді игеруге мүмкіндік алады. Мұндай тәсіл жұмыс берушінің өзекті қажеттіліктерін ескере отырып кадрлар даярлауға ықпал етеді және түлектердің еңбек нарығындағы бәсекеге қабілеттілігін арттырады.
Д. Серікбаев атындағы ШҚТУ, Allur Корпоративтік университеті және компанияның өндірістік бөлімшелері арасындағы ынтымақтастық инженерлік білім беру сапасын арттыруға, білім мен өндіріс арасындағы өзара байланысты нығайтуға, сондай-ақ жас мамандарды одан әрі жұмысқа орналастыру мүмкіндіктерін кеңейтуге ықпал етеді.
Студенттердің бағдарламаға үшінші жыл қатарынан қатысуы дуальды оқыту форматының сұранысқа ие екенін және білікті инженерлік-техникалық кадрларды даярлаудағы маңыздылығын көрсетеді.
