2026 жылғы 8 қыркүйекте колледжде профилактикалық жұмыстар аясында 1 курс студенттерімен учаскелік полиция инспекторының қатысуымен кездесу өтті.
Кездесу барысында учаскелік инспектор студенттерге құқық бұзушылықтардың алдын алу, заң талаптарын сақтау және қоғамдық тәртіпті қамтамасыз ету мәселелері бойынша кең көлемде түсіндіру жұмыстарын жүргізді.
Студенттерге әкімшілік құқық бұзушылықтар және олар үшін көзделген жауапкершілік түрлері түсіндірілді. Қоғамдық орындарда өзін-өзі дұрыс ұстау, қоғамдық тәртіпті сақтау, колледждің ішкі тәртіп ережелерін орындау, алкогольдік ішімдіктер мен темекі өнімдерін пайдалануға жол бермеу мәселелеріне ерекше назар аударылды.
Сонымен қатар инспектор буллинг және кибербуллинг мәселелеріне тоқталып, студенттерге қорлау, кемсіту, қорқыту, психологиялық қысым көрсету және әлеуметтік желілер мен мессенджерлер арқылы басқа адамдарға зиян келтіру әрекеттерінің салдарын түсіндірді. Студенттерге буллинг жағдайына куә болған кезде немқұрайлы қарамай, дер кезінде педагогтерге, колледж психологына, ата-аналарға немесе құқық қорғау органдарына жүгіну қажеттігі айтылды.
Кездесу барысында интернеттегі қауіпсіздік, әлеуметтік желілерді жауапкершілікпен пайдалану, жеке мәліметтерді қорғау және күмәнді ақпараттар мен қауіпті ұсыныстардан сақ болу мәселелері де қарастырылды.
Учаскелік инспектор кешкі және түнгі уақытта қауіпсіздік шараларын сақтау, бейтаныс адамдармен қарым-қатынаста сақ болу, жанжал жағдайларына араласпау және қандай да бір құқық бұзушылықтың куәсі болған жағдайда тиісті қызметтерге хабарласу қажеттігін атап өтті.
Сондай-ақ студенттерге өз құқықтары мен міндеттері, кәмелетке толмағандардың жауапкершілігі, құқық бұзушылықтың алдын алудың маңыздылығы және әр адамның өз әрекетіне жауапты екені түсіндірілді.
Кездесу соңында студенттер өздерін қызықтырған сұрақтарын қойып, құқықтық және профилактикалық сипаттағы қажетті ақпарат алды.
Осындай кездесулер студенттердің құқықтық сауаттылығын арттыруға, құқық бұзушылықтардың алдын алуға, қауіпсіз мінез-құлық дағдыларын қалыптастыруға және заң талаптарына жауапкершілікпен қарауға ықпал етеді.
Заңға бағыну, жауапкершілік және қауіпсіздік — студенттік өмірдің маңызды бөлігі!
