4 наурыз 2025 жылы АДА университетінде «Әзербайжан мен Қазақстанның жоғары білім беру саласындағы ынтымақтастығын кеңейту» тақырыбында ректорлардың дөңгелек үстелі өтті. Іс-шараға екі елдің білім министрлері, жетекші университеттердің ректорлары және академиялық қауымдастық өкілдері қатысты.
Дөңгелек үстел аясында қазақстандық және әзербайжандық жоғары оқу орындары арасында өзара түсіністік туралы меморандумдарға қол қойылды. Атап айтқанда, Д. Серікбаев атындағы Шығыс Қазақстан техникалық университеті (ШҚТУ) Баку мемлекеттік университетімен, Әзербайжан мемлекеттік мұнай және өнеркәсіп университетімен, Әзербайжан архитектура және құрылыс университетімен және Әзербайжан техникалық университетімен ынтымақтастық туралы келісім жасасты.
Қазақстан Республикасының ғылым және жоғары білім министрі Саясат Нұрбек екі ел арасындағы жоғары білім және технологиялар саласындағы ынтымақтастықтың жаңа мүмкіндіктері ашылып жатқанын атап өтті. Сондай-ақ, ол Қазақстан мен Әзербайжан арасындағы бауыр қарым-қатынас білім беру және ғылыми әріптестікте де көрініс табуы керектігін баса айтты.
Әзербайжан Республикасының ғылым және білім министрі Эмин Амруллаев екі ел арасындағы білім беру саласындағы ынтымақтастықты дамытудың маңыздылығын атап өтті. Ол жоғары білім беру жүйесін нығайту және университеттердің тұрақты дамуын қамтамасыз ету мақсатында ұлттық мүдделерге негізделген ортақ білім беру стратегиясын іске асыру туралы шешім қабылданғанын мәлімдеді.
Қазақстан Республикасының Әзербайжандағы елшісі Алим Байель екі елде де білім саласында ауқымды реформалар жүргізіліп жатқанын атап өтіп, осы бағыттағы ынтымақтастықтың одан әрі нығаятынына сенім білдірді.
Бұл келісімдерге қол қою - Әзербайжан мен Қазақстан университеттері арасындағы академиялық және ғылыми ынтымақтастықтың жаңа кезеңін бастап, білім сапасын арттыруға және екі ел арасындағы байланыстарды нығайтуға ықпал етеді.
