2025 жылдың 13 ақпанында онлайн форматта студенттер мен оқытушылардың «Суворов оқулары» халықаралық ғылыми-тәжірибелік конференциясы өтті. Іс-шара Ұлы Отан соғысындағы Жеңістің 80 жылдығына арналды. Конференцияға Д. Серікбаев атындағы Шығыс Қазақстан техникалық университетінің, Горно-Алтай мемлекеттік университетінің, сондай-ақ Ресей Федерациясы Ұлттық гвардиясы әскери күштерінің Новосибирск әскери институтының өкілдері қатысты. ШҚТУ атынан модератор қызметін тарих ғылымдарының кандидаты, Қазақстан тарихы және әлеуметтік-саяси пәндер кафедрасының аға оқытушысы Калиева К.С. атқарды.
Конференцияның ашылуында ШҚТУ-дың Қазақстан тарихы және әлеуметтік-саяси пәндер кафедрасының меңгерушісі Капасова Г.З. құттықтау сөз сөйлеп, Ұлы Отан соғысы батырларының ерлігін есте сақтаудың маңыздылығын атап өтті. Конференция барысында ШҚТУ студенттері баяндамалар жасады: Базарқат Жандос Бақытпекұлы Мәскеуді қорғаудағы Бауыржан Момышұлының стратегиялық шешімдері туралы, Зарықбекова Жібек ШҚТУ-дың бірінші ректоры Даулет Серікбаевтың әскери жолы туралы, Кенесқанова Дарна Төлеген Тоқтаровтың ерліктері жөнінде, Мақанова Амина аты аңызға айналған партизан Қасым Қайсенов жайында, ал Тілеутайұлы Мәди Мәншүк Мәметова мен Әлия Молдағұлованың батырлығы туралы баяндады. Сонымен қатар, ШҚТУ оқытушылары да ғылыми баяндамаларын ұсынды: т.ғ.к., қауымдастырылған профессор Айдарбаева Р.К. «Зырян қаласының Ұлы Жеңіске қосқан үлесі» тақырыбында сөз сөйлесе, т.ғ.к. Калиева К.С. Ұлы Отан соғысы жылдарында қаза тапқандар туралы мәліметтерді іздеу тәжірибесімен бөлісті.
Конференция тарихи оқиғаларды талқылау және батырлық мұраны сақтау үшін маңызды алаңға айналды. Студенттер мен оқытушылар өз зерттеулерінің нәтижелерін ұсынып, тарихи фактілерді зерттеудің және соғыс батырларының ерліктерін еске сақтаудың маңыздылығын атап өтті. Қатысушылар баяндамалардың жоғары деңгейде дайындалғанын айтып, ұйымдастырушыларға білім мен тәжірибе алмасуға мүмкіндік бергені үшін алғыстарын білдірді.
