4 маусым күні Д. Серікбаев атындағы ШҚТУ базасында докторантураға (PhD) үміткерлер, "Болашақ" стипендиялық бағдарламасына үміткерлер, ЖОО оқытушылары мен мектеп мұғалімдері, мемлекеттік қызметкерлер үшін қазақ тілін білу деңгейіне (A1, B1) ҚАЗТЕСТ бойынша сертификатталған емтихан өтті. Емтиханның негізгі мақсаты-мемлекеттік тілдік білімді бағалау.
Тестілеу төрт блоктан тұрды: тыңдау, лексика-грамматикалық блок, оқу, жазу. Тестілеу екі жарым сағат бойы арнайы бланкіде өткізілді.
Айта кетейік, ең алдымен А1 базалық деңгейі тапсырылды, ал түстен кейін В1 деңгейіне сертификаттау емтиханы басталды. Тестілеуге Өскемен, Семей, Зайсан, Риддер және т.б. қалалардан 60–қа жуық адам қатысты.
Қатысушылар алдымен жазбаша жұмыс жасап, кейін ауызша бөлімде мемлекеттік тілде сөйлеу дағдыларын көрсетті. Үміткерлер сертификатты бір апта ішінде алады.
ҚР Ғылым және жоғары білім министрлігінің "Ұлттық тестілеу орталығы" ҚАЗТЕСТ бойынша емтихан өткізу үшін Д. Серікбаев атындағы ШҚТУ алаңын таңдауы бірінші жыл емес. Қалыптасқан қарым-қатынастардың сақталуына сенім білдіреміз және тестілеу орталығымен өзара тиімді және жемісті ынтымақтастыққа үміттенеміз.
