Серікбаев атындағы Шығыс Қазақстан техникалық университетінде Бизнес мектебі мен «Қазақстан тарихы және әлеуметтік-саяси пәндер» кафедрасының ұйымдастыруымен «Алтын бесік - Мұзтау» клубының студенттеріне арналған ерекше шеберлік сабағы өтті.
Бұл шара қазақ халқының дәстүрлі қолөнерін насихаттап, студенттерді ұлттық мәдениетпен таныстыру мақсатында ұйымдастырылды.
Шеберлік сабағы барысында студенттер қазақ қолөнерінің шеберліктері мен ерекшеліктерін тереңірек танып, теріден және сүйектен жасалған бұйымдарды, сондай-ақ қыздарға арналған ою-өрнектерді қиып, орналастыру тәсілдерін үйренді. Іс-шараның жетекшісі, ШҚО Сәулет-этнографиялық және табиғи-ландшафттық мұражай-қорығымен бірлесіп жұмыс істей отырып, клубтың студенттеріне ұлттық өнердің қыр-сырын көрсетті.
Шеберлік сабақтарын Өскемен қаласының танымал қолөнер шеберлері - Нұрлан Бекбергенұлы Есхожин мен Жанна Оразқызымен Уалиева өткізді. Олар студенттерге кәсіби деңгейде қолөнердің дәстүрлі түрлерін көрсету арқылы жастардың шығармашылық қабілеттерін шыңдауға мүмкіндік берді. Шеберлер университеттің басқарма мүшесі, халықаралық ынтымақтастық жөніндегі проректордан алғыс хаттармен марапатталды.
Шараның ерекшелігі - жас ұрпаққа тек дәстүрлі оқу әдістерімен ғана емес, сондай-ақ ұлттық құндылықтарды дәріптеп, бейресми білім беру жолымен де тереңірек білім беру болды. Шеберлік сабақтарына қатысқан 24-СТИК, 24-ТМК, 23-УДК, 23-МКК, 24-БЭК, 24-БФК топтарының студенттері бұл іс-шарадан мол әсер алып, ұлттық өнерге деген қызығушылықтарын арттырды.
Жалпы алғанда, бұл шара студенттерге өздерінің шығармашылық мүмкіндіктерін кеңейтіп, қазақ халқының қолөнеріне деген құрметті арттырды. Сонымен қатар, осындай іс-шаралар жастардың ұлттық дәстүрлерді сақтап, оларды болашақ ұрпаққа жеткізуге деген ұмтылысын қалыптастыруға үлкен үлес қосады.
