Металлургтер мәдениет сарайында ұлы ойшыл және ақын Абайдың туғанына 170 жыл толуына орай Д.Серікбаев атындағы ШҚМТУ классикалық музыка концертін ұйымдастырды. Концертке университеттің профессорлары мен оқытушылары, студенттер жиналды. Концертті ҰҒА академигі, белгілі абайтанушы Ғарифолла Есімов жүргізді.
– Бұл шара биология ғылымдарының докторы, профессор, өзім көптен бері білетін, сыйлас Жасұлан Шаймарданов басшылық жасап отырған Д.Серікбаев атындағы ШҚМТУ-да ұйымдастырылғанына қуаныштымын, - деді ол.
Ол студент жастарға Абай жолымен жүріңдер деді.
– Абай өлеңдері мен шығармаларын жыл сайын оқу керек. Сонда ғана нағыз Адам боласыңдар, тура жолдан таймайсыңдар,- деді ғалым.
Сонан соң ол ҚР еңбек сіңірген артисі, ҚР Мемлекеттік сыйлығының лауреаты, Абай атындағы мемлекеттік академиялық опера және балет театрының солисі Шахимардан Әбіловті таныстырды.
Әнші өзінің шығармашылығын Абай әндерін орындауға арнаған. Сахнадан лирикалық музыка, Абай әндері, орыс және шетел ақындарының сөздеріне жазылып, қазақшаға аударылған романстар, әр жылдары Абайға еліктеп әндер жазған композиторлардың шығармалары шырқалды. Шахимардан Әбілов «Желсіз түнде жарық ай», «Біреуден біреу артылса», «Сегіз аяқ», «Қор болды жаным», «Бойы бұлғаң» сияқты көптеген әндерді орындағанда көрермен ризалығына бөленді. Пушкиннің, Лермонтовтың, Гетенің, Крыловтың өлеңдеріне Абай жазған шығармалар қазақтың алғашқы романстары деп есептеледі. Ал Абай бұл жанрдың негізін қалаушы. Концерт «Айттым сәлем, Қаламқас» әнін әншімен бірге бүкіл зал орындауымен аяқталды.
Жанат Намысбаева
