Даулет Серикбаев атындағы Шығыс Қазақстан техникалық университетінде елдің оңтүстік өңірлерінен келген талапкерлермен кәсіби бағдар беру жұмыстары белсенді түрде жалғасуда. Бұл бағытта мемлекет тарапынан жүзеге асырылып отырған «Серпін-2050» бағдарламасы аясындағы жұмыстар ерекше маңызға ие. Аталған бағдарлама жастарға еліміздің индустриялық дамыған аймақтарында сапалы жоғары техникалық білім алуға мүмкіндік береді.
ШҚТУ бұл бағдарламаны табысты іске асырып келеді және студенттерге қолайлы жағдай жасалған: оқу кезеңінде жайлы жатақханалар беріледі, заманауи зертханалармен жабдықталған ғылыми-білім беру құзыреттілік орталықтары жұмыс істейді. Оқыту жүйесі тәжірибеге негізделген және студенттерге білікті мамандар мен оқытушылар тарапынан тәлімгерлік қолдау көрсетіледі.
Университеттің Шығыс Қазақстан өңірінің жетекші өнеркәсіптік кәсіпорындарымен тығыз әріптестігі арқасында «Серпін» бағдарламасының түлектері мамандықтары бойынша жұмысқа орналасып, болашағын осы өңірмен байланыстыруға нақты мүмкіндік алады. Бұл жас ұрпақтың кәсіби қалыптасуы мен тұрақты өмір сүруіне берік негіз қалайды.
