Д. Серікбаев атындағы Шығыс Қазақстан техникалық университетінің базасында 7–11 сынып оқушылары мен колледж және жоғары оқу орындарының студенттерін біріктірген Ғылым фестивалі өтті. Ғылыми-ағартушылық іс-шараға 300-ден астам жас қатысты.
Фестивальдің негізгі тақырыптарының бірі заманауи атом және ядролық технологиялар, оларды бейбіт мақсатта пайдалану, энергетикалық жобалардың экологиялық аспектілері, сондай-ақ ядролық және радиациялық технологияларды түрлі салаларда қолдану мүмкіндіктері болды.
Фестивальдің ашылуына Шығыс Қазақстан облысының, ШҚТУ-дың, ғылыми және қоғамдық ұйымдардың өкілдері, атом технологиялары саласының мамандары қатысты.
Сараптамалық бағдарлама саланың практикалық бағыттарына арналды. Қатысушыларға Қазақстанда бейбіт атомды пайдалану, ядролық және радиациялық технологияларды энергетикадан тыс салаларда қолдану және заманауи энергетикалық жобалардың экологиялық аспектілері туралы айтылды.Мұндай фестивальдің техникалық университет базасында өтуінің маңызы зор. Атом энергетикасы мен онымен байланысты технологияларды дамыту заманауи ғылыми-білім беру базасын және жаңа буын мамандарын даярлауды талап етеді. Сондықтан мектеп қабырғасынан бастап жастардың физика, химия, энергетика, инженерия және ғылыми-зерттеу қызметіне қызығушылығын қалыптастырып, осы бағыттардың болашағын көрсету маңызды.
Бағдарламаның елеулі бөлігі интерактивті форматта өтті. Қатысушылар зертханалық жабдықтармен жұмыс істеп, химиялық тәжірибелер жүргізді, сұйық азоттың қасиеттерімен және өте төмен температуралардың әсерімен танысты, практикалық ғылыми тапсырмаларды орындады. Зерттеу реакторына жасалған VR-экскурсия ерекше қызығушылық тудырды. Сонымен қатар қатысушылар реактор моделін құрастыруға мүмкіндік алды.
Фестиваль аясында ШҚТУ кәсіби бағдар беру жұмыстарын да жүргізді. Мектеп оқушылары мен колледж студенттері университеттің білім беру бағдарламалары және мамандықтарымен, инженерлік даярлық мүмкіндіктерімен, ғылыми, жобалық және зерттеу қызметінің бағыттарымен танысты.Мұндай формат жастарға мамандықтар туралы ақпарат алып қана қоймай, заманауи технологияларды іс жүзінде көруге, мамандармен тікелей пікірлесуге және болашақ инженерлер мен зерттеушілерге қандай білім мен құзыреттер қажет екенін тереңірек түсінуге мүмкіндік береді. Мектепте оқытылатын пәндер, мамандық таңдау және энергетика, атом саласы мен басқа да жоғары технологиялық бағыттардағы кәсіби мүмкіндіктер арасындағы байланысты көрсету де маңызды.
ШҚТУ үшін Ғылым фестивалі - инженерлік және техникалық бағыттарды кеңінен таныту, жастардың ғылымға қызығушылығын арттыру және болашақ мамандығын саналы таңдауға көмектесу бағытындағы жүйелі жұмыстың жалғасы.
Фестиваль ғылымды, білім беруді және кәсіби бағдарды бір алаңда тоғыстырып, жастарға техникалық университет базасында перспективалы технологиялармен және маман даярлау бағыттарымен жақынырақ танысуға мүмкіндік берді.
